سونے سے یادداشت بہتر ہوتی ہے

تازہ ترین تحقیق کے مطابق رات بھر کی گہری نیند کا دماغ پر ڈرامائی اثر پڑتا ہے اور آپ زیادہ باتیں بہتر طور پر یاد رکھ سکتے ہیں۔

خیال کیا جاتا ہے کہ گہری نیند سے دماغ کے ان خلیات کےکنکشن مضبوط پوتے ہیں جن کی بدولت ہمیں نئی

Sleep

چیزیں سکھنے اور باتیں یاد رکھنے کی صلاحیت حاصل ہے۔

یہ تحقیق جنیوا یونیورسٹی میں کی گئی ہے اور اس کے نتائج دماغ کے ماہرین کی ایک کانفرنس میں پیش کیے گئے ہیں۔

رسرچ میں بتیس لوگوں نے حصہ لیا جنہیں کوئی نیا ہنر سکھایا گیا یا کچھ تصاویر دکھائی گئیں جن کے بارے میں ان سے بعد میں پوچھا گیا۔

پر رسرچ میں شامل رضاکاروں کو دو گروپوں میں تقسیم کیا گیا۔ ایک گروپ میں آرام سے آٹھ گھنٹے سونے دیا گیا جبکہ دوسرے گروپ کی نیند میں خلل ڈالا گیا۔

اگلے دن ان سے وہ باتیں دہرانے کے لیے کہا گیا جو انہیں ایک روز قبل بتائی گئی تھیں اور اس دوران ان کا دماغ کس طرح کام کر رہا ہے، اس کا کمپیوٹر کی مدد سے جائزہ لیا گیا۔

جو لوگ پوری رات آرام سے سوئے تھے، انہوں نے بہتر یادداشت کا مظاہرہ کیا۔

رسرچ میں شامل ڈاکٹر سوفی شوارٹز کے مطابق اگر کوئی نئی چیز سیکھنے کے بعد کچھ دیر آرام سے سویا جائے تو اسے یاد رکھنے اور اس سے بہتر طور پر استفادہ کرنے کے امکانات بہتر ہوجاتے ہیں۔

ڈاکٹر شوارٹز کہتی ہیں کہ گہری نیند سے نہ صرف نئے تجربات کو بہتر طور پر جذب کیاجاسکتا ہے بلکہ وہ یادیں بھی تازہ کی جاسکتی ہیں جو وقت کے ساتھ دھندلی پڑنے لگی ہوں۔

لیکن ان کے مطابق ابھی یہ پتہ لگانے کے لیے مزید رسرچ کی ضرورت ہے کہ کتنی دیر سونے سے سب سے زیادہ فائدہ ہوتا ہے۔ ’ ہم یہ بھی پتہ لگانا چاہتے ہیں کہ جن لوگوں کو ٹھیک سے نیند نہیں آتی، جذبات اور یادداشت کے تعلق سے ان پر کیا اثر پڑتا ہے اور اس کی وجہ کیا ہے۔‘

نیند کی اہمیت اپنی جگہ لیکن برطانیہ میں چار ہزار لوگوں کے ایک حالیہ جائزے سے یہ بات سامنے آئی تھی کہ رات میں صرف بیس فیصد لوگ آٹھ گھنٹے سوتے ہیں۔